بسم الله الرحمن الرحيم
بسأل عليك
كل الإشارات البتفتعل الزحام
تكتم نفس كل الشوارع وتحبسن
تسمع شتايم المارة تحسب في الزمن
بي حجة الصح والنظام........
بسأل عليك
نضم الجرايد والصحف وكل منشور انكتب
بسأل عليك فرح المدينة الدون سبب
وحسرة الريف والضواحي و هم مساجين التعب
ولمة الناس القدام........
والنيل مرق تالا البحر لملم خطاهو علي الشمال
لا فترو الصبح المرق من دون سؤال
لا أخرو الحن البيأخر كل من شد الرحال
لا خاف يسافر في الضلام........
و بفتشك في صوت خنق بالوجعة والخوف الألم
في حس سكن شارع الشعوب الضاجة هم
في كلمة تتلبس سكات من غير بغم
تغنيك عن البوح والكلام........
بسأل عليك الوحشة في سكة حديد
صرخة قطر عجلاتو تختصر البعيد
بسأل عليك شبح البيوت
حرس الحدود
ساعي البريد
و اهديك مع المارة السلام....
بمشيها خطوة شرحبيل
وبقصو دربك دون أتر
و اسأل عليك الساقية والقيف والمطر
واتحسسك جوة القصيد
ووسط تناهيد الوتر
لا ريدك الجواي فتر
لا في الدواخل شوقي نام....
بسأل عليك زمنا مضى إحساسو حي هندامو مات
بسأل عليك الأغنيات
صوت وردي حس ابو عركي دلوكة البنات
زيدان بغني الليلة ديك
والحوت بقول بسأل عليك
وأبو سيد بردد يا سلام.......
وئام كمال الدين.....
#شبكة_انكور_التطويرية
