بسم الله الرحمن الرحيم
صبري على نفسي لحالي تحت سرب من النجوم . شعر
كانك معزّم للسفر قلّي قبل تمشي بيوم
وكانك ما تكره خوّتي يمكن تحصّل لك خوي
يا حبني للبر والمجلاس في عالم الرجوم
وان حدّني وقتي صبرت وقلت حيل الله قوي
يا كثر ما جمع نصيبي من رجال ومن رخوم
وما عندي الا طب بدو.. أشبّ ناري واكتوي
صبري على نفسي لحالي تحت سرب من النجوم
في لابةٍ طرماء ولا اسمع غير سرحان يعوي
اخير من هرجة مقلبة الحقايق والعلوم
الحاسدين الحاقدين اهل الحنيك الملتوي
لاعل نفسٍ عن كلام الهزل ما تقدر تشوم
يارب تكتمها كتم يارب تزويها زوي
نفسي معوّدها على برد العقارب والسموم
مولود بالحرّه مجرّب برد راس المقروي
حرة غطفان الحصينه بالدفاع وبا الهجوم
يجل الجراد الياسمع بركانها يدوي دوي
لا طالت الشطة ترى قلبي على الفرجه عزوم
اجنب الرسّ الردي وارد على العد الروي
وأمشي على حسب العقيده والمبادي والسلوم
وارد على وضح النقا وصل دلوي وارتوي
لا تحسبوني نمت ياخصامي ترى ما في نوم
لو تنظروني ملتحق تراي صل منطوي
#شبكة_انكور_التطويرية
