بسم الله الرحمن الرحيم
يا الراضعه من النيل....
حليب الخضره والوجه الحسن...
يا حلوه زي ضحكة بنيات الصباح
ما بين صلاة العيد
وبين الخاطر الموجوع مشن....
يا انتي..
يا الداير اقول اسمك...
اذا ما ناوا...
أو من ناوا...
أو في ناوا....
ما اسمك اذن..؟؟؟
اسمك...وجع زول من بعيد
جاييكي هارب من هموم الدنيا والخوف والمحن
وكت السفر
كان قربه فوق ضهر النياق
خالف رجولي علي حوية الشوق
وراخي عليكي يا حلوه الرسن
ما الرجعه ليك
كان رجعه للناس والوطن....
يا الراضعه من النيل..
حليب الخضره والوجه الحسن
أنا داير اكتب ليك جواب...
تاريخو من اول غياب....
بسم الذي سوانا منك..ومن وسط هذا التراب
علك بخير
يا الراقده فوق النيل ممده...
بين ضفاير اللوبي والفول والتساب...
يا الداخله بين سعف النخيل
يا المارقه من شدر الهشاب
بعد التحايا وشوق كما شوق العتامير للسحاب....
ان شاء الله كل الناس بخير...
ناس البلد بي عافيتهم..
من آخر الجبانه لي طرف البحر...
للجايي من بطن الخدار
بين التقانت والشدر
والداخلي في بطن المراح
والدابو ماشي علي المتر
للبربخ المفتوح وللحوض الملا الواطه وكسر
للشفع الكان في الرعيه
الكانو جارين في ورا القمري
وورا طير البقر
بالله اغريهم تحياتي وسلامي نفر نفر...
من دون فرز
الشوق بحر....
لا قبلي لا بحري البلد
لا جبهجيه ولا شيوعيه البلد
هذا البلد ما عندو حد...
كان ميضنه
وكان بيت سمايه وكان فرح
او لمه فوق ود اللحد
بسطاء وحنان ناس البلد
طيبين كما شدر النخيل ناس البلد
صافين صفا النيل الصباح
في الحجره متمدد رقد
ياهم...كما هم من زمان...والي الابد
ناس دين وناس متيقنين...
ما بعرفو الشين والكعب....
المسره كان صابت...
يقولولك (حمُد) مستوره تب
والمسره كان خابت...
يقولولك (حمُد) من فوقنا رب
يا رب تلم ناس البلد...
في الحله رطانه وعرب
ما نحن ما اتفرقنا الا وكت دخل...
بيناتنا شيطان الغضب....
يوم قلنا نمرق للعلم...
نقرا ونجيكي علي فهم
غبنا ورجعنالك وهم...
ايه يعني نقرا عشان نجي
ونملاكي هم
وروني بس في الصفحه كم
هذا البلد
كان يقبل القسمه ويعيش
ما دام هو ذاتو لحم ودم
هذا البلد زي ايي زول
هل شفتو زول...يوم اتقسم...؟؟؟
كم بيت هجرناهو ومشينا
وسط رمال الحله بي فوق اندفن
كم حيطه وقعت في البلد
كانت ضرا وكانت سكن
كم باب متاكا وكل عام وانتم بخير
مكتوبه بي تاريخ قديم
من كم زمن...
انا ما بقول...
انا قد حضرت ولم اجد أحداً...ولا بقدر اقول
ضاع الكلام ساكت سديً
ما انتو تملو العين ومن ارجل رجال هذا الوطن...
ما دام نهايتها فد شبر
وآخر هدم يسترنا في الآخر كفن...
خلونا نملا الكون غنا
وننسي المرارات والاحن
نتلم في فد عنقريب
بي نيه اصفي من اللبن
شان خاطر البلد الهناك
الراضعه من النيل
حليب الخضره والوجه الجسن
الطيبه قشاشة دموع غربتنا في زمن الحزن
يا الداير اقول اسمك
اذا ما ناوا...
أو من ناوا...
أو في ناوا...
ما اسمك اذن....؟؟!!!!!
ــــــــــــــــــــــــ أنا.....
#شبكة_انكور_التطويرية
