بسم الله الرحمن الرحيم
مدهوشه بيك روحى السهت
تشيل شبال تخت
فرحانه جد مليانه شوق
طربانه فى الدنيا الأمل
تتهادى زى ريلاً قدل
سلطانو فوق كل الخلوق
تاجو من ألوان رضاك
مشغوله بى أحجار هواك
ضوايه زى شمس الشروق
مشتهيه بس لو يوم ألاقى
تتهنى أحلامى البواقى
أقدارى لى فرحك تسوق
رضاكا ياأجمل مكان
كاسينى بى فرح الزمان
ظنونى بى ثقتك تروق
تهدينى بى رفقه ومهل:
"الغيره يالسع النحل
زيدينا من عسلك نضوق"
أملكنى فى الزمن الجنون
أصلى ليك قبال أكون
مكفوله ليك كل الحقوق
أسكنى زى نبضى وتمام
فى قلبى أزرع حب هيام
أسرى جواى فى العروق
أرضى من قبليكا بور
أغرز الشتله الحبور
أرويها ماتنسى الشقوق
أسقيها من موية العشق
أكسيها من لون الشفق
أحميها من دنياك مروق
أديها من طبعك صفه
أهديها لى زمنك هبه
أرضاها فى الزمن العقوق
#شبكة_انكور_التطويرية